Собор новомучеников и исповедников Церкви Русской

Тропарь
Днесь радостно ликует Церковь Русская, прославляющи новомученики и исповедники своя: святители и иереи, царственныя страстотерпцы, благоверныя князи и княгини, преподобныя мужи и жены и вся православныя христианы, во дни гонения безбожнаго жизнь свою за веру во Христа положившия и кровьми Истину соблюдшия. Тех предстательством, Долготерпеливе Господи, страну нашу в Православии сохрани до скончания века. 
Кондак
Днесь новомученицы Российстии в ризах белых предстоят Агнцу Божию и со Ангелы песнь победную воспевают Богу: благословение, и слава, и премудрость, и хвала, и честь, и сила, и крепость нашему Богу во веки веков. Аминь. 
Величание
Величаем вас, святии новомученицы и исповедницы Российстии, и чтим честная страдания ваша, яже за Христа претерпели есте.
Светилен
Яко отребие, миру бысте, святии новомученицы и исповедницы Российстии, камением побиени быша, претрени быша, искушени быша, убийством меча умроша, свидетельствующе о Свете Истиннем, Иисусе Христе, Господе нашем.